Ginpasar sini nga hapon sang Sangguniang Panlalawigan sang Negros Occidental ang resolution nga naga pabutyag sang grave concern sa desisyon sang Korte Suprema nga naga kakas sang jurisdiction sang local government unit sa municipal waters kag naga tugot sang bukas nga commercial fishing.
Ang resolution nga gin-author ni Board Member Andrew Montelibano ang naga panawagan man sang gilayon nga action para mapangapinan ang kinamatarung sang mga mangingisda kasubong man proteksyon sa fisheries kag marine resources.
Ang amo nga desisyon sang Korte Suprema ang naga butang sa alang-alang sang palangabuhian sang masobra sa 2 milyones ka magagmay nga mga mangingisda sa bilog nga pungsod lakip na ang gikan sa probinsya sang Negros Occidental.
Suno kay Governor Eugenio Jose Lacson, yara na sa national government ang pag-file sang appeal.
Luyag lang sang probinsya ang mag pahibalo nga lubos ang ila nga suporta sa panawagan sa pag reverse sang desisyon para mapangapinan ang mga magagmay nga mangingisda kag dunang manggad.
Magapadala suno kay Lacson sang opisyal nga panindugan sang probinsya kasubong man sang resolution nga gin pasar sang Sangguniang Panlalawigan.
“What we can do is let BFAR, Department of Agriculture, the Department of Justice know that we are concerned. We appeal to them to represent these small fisherfolks”, suno kay Lacson.
Ang Korte Suprema sa desisyon sini ang nag tugot sang commercial fishing sa 15 kilometer municipal water matapos gin kwestiyon sang isa ka fishing company ang constitutionality sang pila sa mga provision sang Fisheries Code.