Siudad sang Kabankalan may pinakamataas nga active COVID-19 cases sa mga banwa kag siudad sa Negros Occidental sandig sa ginpagwa nga datus sang Provincial Incident Management Team.
As of October 21, may 153 ka active cases ang siudad.
Suno kay Mayor Pedro Zayco, nag patigayon sila sang mass testing sang nagliligad nga semana, gani suno sa iya, iya na nga ginpaabot ang pagsaka sang kaso.
Pero, suno sa alkalde sa nagliligad nga inadlaw iya naman nakit-an ang pagnubo sang ila nga kaso.
Sa datus sang kabankalan, matapos ang tatlo ka adlaw nga wala sang may na record nga kaso sang COVID-19, ang bag-o nga kaso gin-report sang October 21 naman ukon kahapon. Isa ka 69 anyos nga lalaki ang bag-o nagpositibo sa virus.
Sa mga barangay sa siudad ang Barangay 9 kun sa diin napahamtang ang relocation site nga damlag pa ginpaidalom sa lock down ang may pinamakamadamo nga kaso nga na record – 52. Pero suno sa alkalde may tatlo na lamang ka mga balay sa amo nga lugar ang napabilin sa lockdown.
Mas ginhugot ang pagpatuman sang health protocol sa siudad. Ang wala naga gamit sang mask kag sala nga pag pagamit sang mask ang ginamultahan sang 200 pesos. Ginpatuman man ang liquor ban. Padayon man ang training para sa mga contact tracer.
Ginalauman sang alkalde nga ma flatten ang curve sa masunod nga semana.
Pero suno kay Zayco, may 500 ka mga stranded individual nga ginapaabot naman gikan Manila, Cebu kag Bohol.
139 naman ang recovered cases kag may isa nga nagtaliwan nga nangin positibo sa covid-19.
Sa report sang PIMT, nagasunod ang Silay kag San Carlos sa may pinakamadamo nga kaso.
“Tumaas ang kaso namon diri kay nag mass testing kami. Pero kun indi ka mag mass testing kag maghipos-hipos ka lang, COVID-free gwa mo. Once mag mass testing ka, for sure gid ya, ako expected ko na, siling ko makwa gid ni number one pag mass testing ko. Outside Bacolod. Four batches ang mass testing. Waay na kami ka mass testing kay daw na ubos na sila tanan sa relocation. Siguro ma flatten ko na ni by next week,” suno kay Zayco.