Shadow

15 ka positive nga kaso sang rabies sa ido na-record humalin Enero; 58.6% sa target nga mabakunahan nga ido sa probinsya ang nalambot

PTV file photo

May 15 ka mga kaso sang rabies sa ido ang na-record sang Provincial Veterinary Office humalin sang Enero tubtob Setyembre 30 sini nga tuig.

Sa kasubong nga tion sang 2019, may 15 man ka kaso sang rabies ang na-record.

Suno kay Provincial Veterianarian Dr. Renante Decena, 20 ang na-record nga rabies cases sang bilog nga 2019, mas nagnubo ini kun ipaangid sang 2018 nga may 33 ka kaso.

“Sa subong (kun ipaanggid sa 2019) daw amo amo gihapon. Ang areas nga affected Himamaylan and Cauayan. The same ni sya last year. Kag ang sa Mansilingan ang sa Bacolod nga area. So ma duging sa gihapon ang kaso sang rabies sa Negros Occidental kay damo stray dogs. Nadula ang tawo sa street ang ido naman ya ang nagadamo”, suno kay Decena.

Sa datus sang Provincial Veterinary Office as of September 30, may 88,000 naman ka mga ido ang nabakunahan kontra rabies sini nga tuig. Tuman nga nagnubo kun ipaanggid sa datus sang 2019.

Suno kay Dr. Decena, sa kasubong nga tion sang 2019, 148,000 ang nabakunahan nga mga ido.

Paathag niya tuga sang pandemya nangin limitado man ang pag giho sang iya nga mga tawo.

“Ang movement sang aton vaccinators mabudlay. Kun kis-a indi sila kalibot sa barangay. Kag ang tawo gina pabay-an na man lang. Indi gani ka kaon mayo ang tawo kis-a, how much more ang ila nga pets. Naga campaign gihapon ang goyerno sang castration, spaying, like in Victorias”, suno kay Decena.

150,000 ka mga ido ang target na mabakunahan para sa 2020 suno kay Decena. Pero sa masobra duha ka bulan na lang ang nabilin mabudlay na malab-ot ang target ilabi na sa sitwasyon subong. Ika duha suno kay Decena indi man sila makapasiguro sa supply sang bakuna. May counterparting sa supply sang bakuna sa national government, sa probinsya ka sa mga local government units.

Leave a Reply

Your email address will not be published. Required fields are marked *

Secured By miniOrangeSecured By miniOrange