Siudad sang Sipalay ang may separado nga Covid Cemetery. Diri ginalubong ang mga nagtaliwan bangud sang virus kasubong man ang mga yadtong ginakabig nga suspected cases kag wala na napaidalom sa swab test.
Suno kay executive assistant Dionilo Bogtae ginpakamaayo sang siudad nga separado ang lulubngan sang mga yadtong nagtaliwan bangud sang Covid kag ini ang napahamtang sa Barangay Cayhagan.
Sang Domingo, Oktubre 31, sa post ni Bogtae, may tatlo ka pumuluyo ang ginlubong. Paathag ni Bogtae ini sila ang nagtaliwan sang Sabado kag ini mga suspected Covid 19 cases.
Sila ang nakitaan sang sintoma sang Covid-19 pero wala na sila ginpaidalom pa sa swab test sang ila nga pamilya matapos nga magtaliwan. Ang tatlo ang wala man mabakunahan suno sa iya.
Sa patakaran suno kay Bogtae, dapat sa sulod sang 24 oras ang amo nga mga kaso dapat nga mapalubong ukon ayhan ipa cremate. Padayon ang kampanya sang siudad sa Covid -19 vaccines suno kay Bogtae.
Kalabanan sa mga nagtaliwan bangud sang Covid sa Sipalay City mga may edad kag may co-morbidities kag wala mabakunahan.
“Kay te ang ano di namon, basta Covid suspect kag indi na nila pag ipa swab automatic either ipa cremate na lang nila or either ipa rekta lubong sa aton nga Covid Cemetery. Galing halos mga Covid death halin pa last week, puro mga halos sa ila mga senior citizen kag mga unvaccinated. Ginatiyog natun gid upod sa barangay nga gina serbe natun nga information education campaign labi na sa mga senior citizen kag co-morbid bala kay daw ara pa da nga sector nga gamay pa percentage sa ga pa vaccine,” suno kay Bogtae.