Ika duha nga Vax-i bus para sa mobile vaccination drive sang Bacolod ang italana para sa mga senior citizen kag mga kabarangayan nga manubo ang kadamuon sang nakapabakuna.
Masobra na sa otsenta mil ang fully vaccinated sa Bacolod.
Gani agud mapadasig pa ang ginapatuman nga vaccination program, nagdugang sang Vax-i bus ang siudad sa bulig sang Vallacar Transit Incorporated para sa mobile vaccination drive.
Suno kay Bacolod Emergency Operation center executive director nga si Em Ang, mangin prayoridad sang mobile vaccination drive ang mga senior citizens, ilabi na ang mga bed ridden kag kasubong man ang may mga kabudlayan sa pagpadulong sa mga mass vaccination center .
Sang nagligad nga semana sang ginlunsar sang EOC ang Vax-i bus nga gintalana para sa mga market vendors kag katapo sang transport group kun diin may masobra na sa kinyentos ang tigayon nga nakapabakuna.
Ang EOC ang natalana man magapadulong sa isa ka call center firm para sa igalunsar nga vaccination para sa mga graveyard shift ukon mga empleyado nga naga-trabaho halin sa gab-i tubtob kaagahon.
May 1,200 ka mga call center agent kag staff ang target nga mabakunahan pinaagi sa vaccination program.