Nagdangat sa masobra 3.2 million pesos ang benta sang mga vendors nga nagpakigbahin sa tatlo ka adlaw nga Bacolod Chicken Inasal Festival 2026.
Ini ang mas mataas sang 39 percent ikumpara sa masobra 2.3 million pesos nga sales sang festival sang tinalikdan nga tuig nga ginhiwat sa sulod sang lima ka adlaw.
Suno kay Councilor Celia Flor, pamuno sang BCIF Committee, dako ang bulig sang nasambit nga festival sa mga vendors ilabi na sa mga nagabaligya sang inasal.
Sandig sa ila rekord, sa tatlo ka festival venues, 80 tubtob 90 porsyento sang mga stalls ang nagabaligya sang chicken inasal nga ginapabugal sang siudad.
Dugang sang konsehal, sa ila obserbasyon, nagadamo nga nagadamo ang festival goers kada tuig, rason nga nagasalig man ini nga sa masunod nga Chicken Inasal Festival, mas makabenepesyo pagid ang mga inasal vendors.
Nanari sari nga mga aktibidad ang ginpatigayon sa sulod sang tatlo ka adlaw nga selebrasyon kag nangin highlight diri ang kadalag-an sang Barangay Granada sa Bacolod Chicken Inasal Festival Arena Dance Competition sang Sabado sa The Upper East sang Megaworld.
“Nakita taman maski sa income siguro dira naton makita nga nag-increase pagid ang attendance. Damo gid to, ako naka attend gid ako sa Megaworld sa parade kag sang street dance. Ang iban gani to nag reklamo gid nga kagutok-gutok gid. So amo na nga makasiling ko, even sa Ayala, kay nakalibot man ko kag sa SM, damo gid man ang festival goers naton. Nalipay kita sina. Hopefully, next year ma expand pagid naton ang pag-imbitar kag basi may guest na kita from outside Bacolod”, suno kay Flor.*
[sibwp_form id=1]