Salakyan sang DRRMO sang Cauayan LGU kag motor nag bungguanay, 2 patay.
Patay sanday Reymark Cagas nga naga dala sang motor kag ang aider sang rescue vehicle nga si John Philip Atillaga matapos magbungguanay ang rescue vehicle sang banwa sang Cauayan kag motorsiklo sa Brgy.Talubangi siudad sang Kabankalan kaina sang kaagahon.
Suno kay Kabankalan City Deputy Chief Police Captain Joelan Vinson, padulong sa ospital ang rescue vehicle nga may karga nga pasyente, apang hinali lamang nga nag-agaw sang iya nga lane ang naga sugata nga motorsiklo nga ginamaneho ni Cagas gani nagbungguanay sila.
Pilason naman ang backrider sang motor kag wala naman nasamaran ang driver sang rescue vehicle nga si Michael Dela Cruz.
Sa karon, yara na sa kustodiya sang Kabankalan City Police Station ang driver sang rescue samtang padayon naman nga ginabulong sa ospital ang backrider sang motorsiklo.