Ang Barangay Gil Montilla sa Sipalay City ang isa sa mga tuman nga nahalitan sang bagyo nga Odette.
May mga pamalay nga yara sa higad lang sang suba. Pag awas sang tubig sa suba, nag sulod ini sa mga pamalay. Ang iban nagkala anod.
Si Teresito Ballon, may mga bagras sa nagkalain lain nga parte sang iya lawas. Gin istorya kun paano siya naka luwas sa pagka anod sa suba nga halos apat ka kilometro ang kalayuon sa iya nga balay. Ginhigtan nila sang iya anak ang ila lawas sa mga container sang tubig para maglutaw.
Si Nida Aborido, tatlo na ka adlaw ang pangit-anay sa iya anum ka mga himata. Duha niya ka mga utod kag apat ka hinablos ang na missing matapos ang bagyo. Wala sila naga untat sa pag libot kay basi pa lang makita na sila.
Ang ini nga mag bayaw naga upod sa mga rescuers sa pagpangita sa ila nga iloy.
Pito sila ang nagkala anod, naka luwas ang anum sa ila nga himata pero ang iloy nga si Dionolita Amaro ang wala na makit-an pagkatapos sang bagyo.
Suno sa kay Dionilo Bogtae ang pamuno sang Public Safety and Sipalay Emergency Assistance and Rescue Services, as of December 20, 2021… 17 ang nagkala sapwan nila nga patay kag 17 man ang missing. Gina paabot nila nga madugangan pa ini.
Suno sa officer in charge sang DSSD-Sipalay nga si Ivy Gallanero, gina kulang man sila sa mga tawo kay pati ang mga empleyado sang siudad mga biktima man sang bagyo. Pero gina tinghuaan nila sa gihapon nga mahatagan sang relief goods ang mga pumuluyo.
Sang Domingo nagdala ang Digicast Negros sang inisyal nga bulig sa siudad. Mga loaves sang tinapay gikan sa Merzci, bugas gikan sa Rotary Club of Bacolod Central kag alcohol.
Si Mayor Gina Montilla ang nag siling nga ilimnon nga tubig pati na construction materials gid sa karon ang labi nga kinahanglan nila.