Naga pabilin nga estable ang presyo kag supply sang baboy kag manok sa Negros Occidental karon nga nagsugod na ang holiday season.
Sa una nga mga inadlaw sang Disyembre may gamay nga pagsaka sa presyo sang baboy kag karne sang baka sa monitoring sang Provincial Veterinary Office.
Base sa average price, 42 centavos ang average nga ginsaka sa presyo sang kada kilo sang baboy kag baka suno sa PVO.
Sa mga monitoring naman sa LGU, ang Kabankalan, Ilog kag Sipalay ang may pinaka mahal nga presyo sang baka sa merkado – P 450 pesos ang kilo kag Toboso naman ang may pinaka barato – P320 pesos.
Samtang, sa baboy, ang Hinigaran ang may pinaka mahal nga kilo sang baboy P 370 kag Toboso sa gihapon ang may pinaka barato – P 250 pesos.
Sa dressed chicken, P240 kada kilo ang presyo sa Victorias, pinaka mahal sa probinsya kag P180 naman sa EB Magalona – pinaka barato.
Damlag pa, ginsiling na ni Dr Placeda Lemana, provincial veterinarian, nga wala sila sang may nakita nga problema sa supply sang baboy sa probinsya bisan pa nga naigo man sadto ang Negros Occidental sang African Swine Fever.
Suno kay Lemana, padayon man gani ang pag padala sang probinsya sang supply sa iban nga kaiping nga mga probinsya.