Gin-endorse na sang Office of the Civil Defense sa Malacanang ang gina hinyo nga pondo sang mga apektado nga banwa kag siudad may kaangtanan sa paglupok sang bulkan Kanlaon.
Suno kay OCD NIR Regional Director, Donato Sermeno, III, na endorse na ni OCD Administrator, USec Ariel Napomuceno ang hinyo sang La Carlota City nga masobra sa 63 million pesos kasubong man ang 47 million pesos sang La Castellana.
Wala labot sa ila, na endorse naman ang ginhinyo nga pondo sang Canlaon City kasubong man ang sa Himamaylan City para sa tent city nga ginatukod.
Paathag ni Sermeno pending ini sa karon sa approval sang Malacanang.
Ginsiling ni La Carlota City Mayor Rex Jalandoon Jalandoon nga ang 63.097 million pesos nga request ang na submit sadto pang pag lupok sang bulkan Kanlaon sang Disyembre.
Tuyo sini ang kagastuhanan sa operation sang evacuation center.
Ginsiling naman ni La Castellana Mayor Rhummyla Nicor-Mangilimutan nga magluwas sa 47 million pesos nga ila gin-request may gin submit pa siya nga 167 million pesos nga request para sa permanent relocation sang yara sa 4 km permanent danger zone kag ini ang naga lakip sang rehabilitation kag livelihood sang mga apektado.
Dugang pa ni Nicor-Mangilimutan may 500 million pesos man siya nga request angut sa proposal sang relocation sang yadtong naga puyo sakop sang 6km danger zone.
Naga lakip na ini sang evacuation structure kun sa diin na integrate na ang eskwelahan.
“Na-endorse na na, upod na sa gin pang endorse tanan ni USec Nepomuceno for approval sang Malacanang. Once nga gin-forward ni USec Nepomuceno, maagi na sa Department of National Defense kag sa Malacanang. May initial na na sila nga discussion. Na delay na kay tungod sang gin plantsa pa sang nagligad ang procedure sa pag-release sang QRF, nag storya pa ang DBM kag OCD”, suno kay Sermeno.