La Castellana Mayor Rhumyla Nicor-Mangilimutan kag Major Nelson Amsiwen, Jr., OIC sang La Castellana PNP sa press conference sang Biyernes agnut sa recruitment scam
Ginapaabot ang pag file sang reklamo sa La Carlota City Prosecutor’s Office sang mga napulo ka gina alegar biktima sang recruitment scam para sa PNP.
Ini suno kay Mayor Rhumyla Nicor-Mangilimutan nga nagsiling man nga padayon pa ang pag execute sang affidavit sang iban pa gid nga mga tagreklamo.
Suno sa alkalde nalakip sa pasaakaan sang reklamo ang Konsehal nga si Donato Dumaguit alyas Nat-Nat kag isa nga ginkilala kay Mary Jun Tagua Delos Santos kag pila ka John Does.
Large scale estafa ang ipasaka batuk sa ila suno kay Nicor-Mangilimutan. Gina-alegar sang mga tagreklamo nga sila ang gintanyagan sang bulig sang mga natungdan para makasulod sa PNP, ukon sa Coast Guard, BJMP ukon Bureau of Fire Protection kabaylo sang bayad.
Minilyon ka pesos ang ginreport kabilugan nga nakolekta. Ginhimutig man ni Nicor-Mangilimutan ang nangin sabat ni Dumaguit sa katapo sang media nga siya ang ginpulitika sang alkalde.
Ginahaylo ni Nicor-Mangilimutan nga mag tambong na sa SB session kag magsabat man sa mga alegasyon batuk sa iya. Samtang, direkta man nga naga pakig-angut ang Provincial Legal Office suno sa alkalde sa tuyo nga makabulig sa affidavit sang complainants.
“Ang diri lang ya sa amon jurisdiction. Ang diri lang ya nga krimen natabo sa La Castellana amo na siya i-file. Pero so far subong sige-sige ang kuha sang affidavit sang mga witnesses. Base sa nabatian ko kag gin share man sang taga investigation nga maybe it will fall sa elements sang large scale estafa. Pero te since the court will decide kun ano gid nga kaso,” suno kay Nicor-Mangilimutan.