World Radio Day gindumdom sang katapo sang media kag Bacolod City Government. Mga programa sa radyo nga dinekada na nga nagahatag impormasyon kag kalingawan sa publiko ang ginkilala.
Sa pagtililipon sang katapo sang media sa Bacolod City Government Center, ginkilala kag gindayaw sang mga lokal nga opisyales sang siudad ang mga radio broadcasters, reporters kag commentators nga nakabulig sa paghatag impormasyon sa pagpasanyug sang sosyadad.
Ginsiling ni Councilor Vladimir Gonzalez nga ang patas kag mapuslanon nga balita ang nangin pundasyon sang demokrasya kag maayo nga panghimanwa.
Magluwas sa mga broadcasters, ginpasalamatan man sang local government unit ang mga Disc Jockeys, mga dramatista kag iban pa nga radio talent nga dinekada na nga nagahatag kalingawan sa publiko.
Sa pagtililipon, nagpasalida man ang mga radio talent sang bantug nga programa sa local radio nga naghatag kakunyag sa mga tumalambong.
Nagapati ang katapo sang Kapisanan ng mga Broadcasters ng Pilipinas nga bisan halos nadula na ang mga cassette tapes, mga disc kag iban pa nga recording gadgets magapabilin ang mabaskog nga pagpalayag sang radyo sa pihak man sang pagpanghangkat sang panahon.