Bitbit ang search warrant, nagpadulong ang kapulisan sa balay sang kapitan sa Hacienda Nasipunan, Barangay 12 sa Victorias City, sang Biyernes, Hulyo 17.
Naabtan sang katapo sang Victorias City PNP, Criminal Investigation and Detection Group-Negros Occidental kag Regional Mobile Force Battalion ang barangay kapitan nga si alyas “Gar”, 54-anyos.
Nakuha sa pag-implement sang search warrant ang isa ka caliber .22 revolver loaded sang anom ka rounds sang ammunition, dugang nga 63 ka mga bala kag isa ka granada.
Isa ka concerned citizen ang nag-report nga may mga indi lisensyado nga armas ang kapitan.
Ginsiling ni Police Lt. Enrique Casila, deputy chief sang Victorias PNP, napasaka na ang kaso nga pagsupak sa Republic Act 10591 ukon Comprehensive Firearms and Ammunition Regulation Act batok sa kapitan.
Suno sa kapitan, isa siya ka anay licensed firearm holder, ugaling nag-expire ang permit kag iya na ini ginahikutar nga i-renew apang siya ang gin-serbehan na sang search warrant.
[sibwp_form id=1]