Ginbawian sang kabuhi ang isa ka patrolman nga si Jolu Otero matapos gin-alegar nakabunggo sa pang-ulihi nga bahin sang ginasundan nga truck sa national highway nga sakop sang Purok Dahug, Barangay Tabunan sa Bago City, Sabado nga adlaw.
Sakay ang 28-anyos nga pulis sa iya Yamaha NMAX nga motorsiklo halin sa Barangay Sum-ag, Bacolod City padulong sa Barangay Abuanan, Bago City.
Nag-gwa sa imbestigasyon nga nakabunggo ang motorsiklo sa pang-ulihi nga bahin sang ginasundan nga truck.
Matapos ang insidente, nagpadayon ang truck sa pagbiyahe padulong Abuanan.
Nakaangkon sang mga pilas ang pulis kag gindala sa Bago City Hospital apang gindeklarar nga dead on arrival.
Residente sang La Carlota City ang pulis kag naka-assign sa 2nd Platoon sang Negros Occidental Provincial Mobile Force Company nga naka-base sa Barangay Dulao, Bago City.
May isa ka bata ang nagtaliwan nga patrolman.
Sa karon, wala pa makilal-an ang driver sang truck apang suno sa Bago PNP, may nakuha na sila nga CCTV footages malapit sa lugar.