Tatlo ka mga persona ang nalumos samtang nagapaligo sa baybayon sang Purok 13, Sitio Capaclan sa Barangay Inayawan, banwa sang Cauayan, sang weekend.
Gindeklarar nga dead on arrival ang isa ka 15-anyos nga babaye, lima ka tuig nga lalaki kag ang 64 anyos nga lola sa Cauayan District Hospital.
Sandig sa imbestigasyon sang Cauayan PNP, nagapaligo ang duha ka mga menor de edad sang sila ang naanod sa madalum nga parte sang baybay tungod sang mabaskog nga balud.
Pagkakita sang senior citizen, iya gintinguhaan nga salbaron ang duha ka mga bata, apang siya ang nalumos man.
Ginsiling ni Police Lt. Col. Norberto Barniso, hepe sang Cauayan PNP, nga medyo kantilado ang area kun diin nagluntad ang insidente.
Nagresponde sa insidente kag nagpatigayon sang retrieval operation ang katapo sang Philippine Coast Guard, Bureau of Fire Protection sa Bulata kag Cauayan Police Station.