Nauntat sang makadali ang pag-release sang sweldo sang mga job order worker sa Bacolod Government City Center kaina sang aga.
Ini matapos may gin-alegar nga pribado nga indibidwal nga naga-uyat sang payroll.
Nagapila na ang mga JO workers para sa ila nga sweldo sa lobby sang BCGC sang personal nga nanaog si City Legal Officer, Atty Karol Joseph Chiu kag temporaryo nga gin pauntat ang pag pagnweldo.
Suno kay Chiu, may reklamo nga ginpadangat sa iya opisina angut sa gin-alegar nagpautang nga persona nga amo man ang naga uyat sang payroll.
Gani, gin-usisa ang amo nga alegasyon ni Atty. Chiu upod kay City Administrator Atty. Mark Mayo.
Gin siling ni Atty. Chiu sa interview sang media nga dapat personal nga magkuha sang ila sweldo ang mga JO workers kag ang maga-uyat sang payroll dapat ang in-charge ukon ang gikan mismo sa siudad.
Angut diri iya nga ginpangayuan sang incident report ang City Treasurer’s Office nga sila ang in-charge sa releasing sang sweldo.
Ginsiling ni Atty. Mayo, nga ang mga JO workers sa tion ni anay Mayor Albee Benitez, ginapaagi sa ATM ang sweldo.
Sa ATM man dapat ipaagi ang sweldo nila karon suno kay Mayo, ugaling kay on process pa ini.
May kapin sa 1,000 ang JO workers subong nga administrasyon.*