Presyo sang baboy sa mga merkado sa probinsya lakip na sa Bacolod City ang nagsaka.
Sa nagligad nga weekly monitoring mga 7 pesos ang average nga ginsaka sa presyo sang baboy sa kada kilo sa mga merkado.
Sa March 3 nga report sang Provincial Veterinary Office, pinaka mahal nga bili sang kada kilo sang baboy ang yara sa San Carlos City, Pulupandan, Hinoba-an kag San Enrique – 400 pesos ang kilo. Sa Bacolod naman nagadangat sa 420 pesos ang kilo. May pinaka barato naman nga presyo sang kada kilo sang baboy ang Isabela – 320.
Paathag ni Dr Placeda Lemana, Provincial Veterinarian, mahal sa karon ang live weight. Sa auction market ini ang nagadangat sa 240 pesos ang kilo, magluwas na lamang sa Don Salvador Benedicto kag Calatrava nga yara sa 170 pesos ang kilo sang live weight.
Ang pagsaka sa bili sang live weight bangud man sang mataas nga demand gikan sa mga traders sa isla sang Panay. Suno kay Lemana ang mga farmers sa Negros Occidental gina prefer ang pag baligya sang baboy sa mga traders sa Panay bangud mas maayo ang presyo kag tigayon man sila makabawi kun ipanggid sa gina tanyag sa ila sang local traders. Gina kulang ang Panay sang baboy kag sila ang naga kuha pa gani sa Mindanao kag Bohol. Sang Pebrero naka tigayon pa gwa ang probinsya sang mga 5,000 ka baboy.
“I think gasaka pa gid na kay tungod hambal sang mga farmers gina prefer nila abi ibaligya sa mga trader nga halin sa Panay kay mahal ang pamakal sa ila. Kay wala na gid to baboy sa Panay. Siling namon diri na lang anay sa Negros para nga mag bahar-bahar ang presyo. Galing ang rason naman sang farmers nga subong lang sila maka bawi-bawi. Kay ang local traders indi maka compete sa price sang Panay nga traders”, suno kay Lemana.