Isa sa mga pag panghangkat nga ginapangatubang karon sang mga kooperatiba nga nag-upod sa public utility vehicle modernization program ang nagasaka nga presyo sang produkto petrolyo.
Indi man malipod ang nagaluntad nga intra kag inter-cooperative dispute sa pagdumala sang mga modernized jeepney.
Gani kaina nakigsapol si Mayor Albee Benitez sa tiglawas sang Land Bank sa tuyo nga matagaan opportunidad ang mga transport cooperative nga nagatuyo mag gamit sang electric jeepney.
Ginpahayag sang alkalde nga gin-hold anay sang banko ang pagpahulam sang pondo sa mga cooperative bangud madamo ang wala nagabayad sang dues.
Nagapati ang alkalde nga paagi sa e-jeepney mas masarangan sang transport cooperative ang monthly amortization.
Ang Bacolod LGU ang nagtalana sang tatlo tanan ka mga green route ukon mga rota nga para lang sa mga magabyahe nga e-jeepney sa siudad.