Padayon sa karon ang pagpangita sang kapulisan sa isa ka preso nga nakapalagyo gikan Moises Padilla Police Station sang nagligad nga Miyerkules.
Suno kay Police Lieutenant Wilma Silva, deputy PIO sang NOCPPO, may team na nga gintukod ang Moises Padilla PNP para mag pangita sa nakapalagyo nga inmate.
Suno kay Silva, alas 6:30 sang aga sang Oktubre 14, nag reklamo ang inmate nga si Rico Layan, 23 anyos, sang palanakit sang dughan kag hilanat nga sintomas sang COVID-19.
Gani bangud sang iya ginabatyag, siya ang ginpagwa sa detention cell kag siya ang dal-on na kun tani sang kapulisan sa ospital, ugaling samtang naga preparar, suno kay Silva nagpalagyo sa police station si Layan kag nagdalagan.
May mga pulis man sa gate suno kay Silva ugaling madasig ang dalagan sang inmate.
Nagpangayo na sang bulig ang PNP sa publiko agud madakop si Layan.
Si Layan ang gin detain sa kaso nga murder sadtong Hulyo 9 sini nga tuig.
Ang NOCPPO ang maga usisa man sa mga kapulisan sang police station kag ila pasabton ang mga napalagyuhan nga pulis.