Tanan nga contingency lakip na ang logistics sa mga lugar nga apektado sang bulkan Kanlaon ang naplastar na para sa ginapaabot nga piniliay sa Lunes.
Office of the Civil Defense naga abiso sa mga internally displaced voters nga mag kooperar sa maabot nga piniliay.
Ginsiling ni OCD Regional Director Donato Sermeno nga kahapon, Hwebes, sa briefing ni Philippine Institute of Volcanology and Seismology Head, Teresito Bacolcol, wala sang pag bag-o sa ila nga observation sa Bulkan Kanlaon gani naga pabilin sa gihapon ini sa Alert Level 3.
Ang mga local disaster teams yara na sa blue alert para sa gina paabot nga piniliay kag ang OCD naman suno kay Sermeno ang yara sa red alert. Sila ang maga padala man sang ila nga tiglawas sa REMAC ukon ang Regional Election Monitoring Action Center. Ang mga logistics ukon salakyan nga maga dala sang mga bumuluto nga evacuees sa ila tagsa ka mga polling centers ang naplastar naman, wala na sang may nakita nga problema. Panugyan ni Sermeno sa mga evacuees nga bumuluto nga mag cooperate kag magsunod sang instructions. Sa banwa sang La Castellana, siudad sang Bago kag La Carlota, may halos 5,000 ka mga evacuees nga bumuluto ang iga-transport padulong sa ila nga mga voter centers.
“Ang message ko lang is padayon nga mag kooperar sa authorities para nga mag sulhay ang pag proseso sang pag boto naton especially nga may kinahanglanon kita nga sayluhon sa mga presinto. Mag tuman lang gid sang mga instructions. Indi kita mag pasaway para magsulhay ang aton election”, suno kay Sermeno.