Nagdangat sa 25 ka persona ang ginbawian sang kabuhi bangud sa Human Immunodeficiency Virus ukon HIV sa siudad sang Bacolod sang tinalikdan nga tuig.
Ginsiling ni Jonathan Diaz, focal person sang HIV Awareness Campaign, may 183 ka mga cases ang na rekord sa Bacolod humalin Enero tubtob Nobyembre sang 2025.
171 diri ang mga lalaki samtang 12 naman ang mga babaye. Kalabanan sa mga nagpositibo naga edad 25 tubtob 34 anyos.
Suno kay Diaz, tuig 2025 ang may pinakamadamo nga recorded deaths sang HIV sa siudad humalin pa sadtong tuig 1995, samtang 15 anyos naman ang pinakabata nga nagpositibo sa amo nga virus.
Base sa accumulated record sang siudad humalin 1995 tubtob 2025, yara na sa 1,392 ka mga kaso kag 200 deaths ang na rekord sa Bacolod.
Bilang paghanduraw sa mga nagtaliwan nga mga indibidwal bangud sa HIV, magabuylog ang siudad sang Bacolod sa worldwide nga mass and candle lighting memorial ceremony sa Mayo 16.
Pagahiwaton ini sa SM City NorthBlock alas dos sang hapon. May libre man sang testing sa amo nga tion.
Ginpahayag man ni Diaz nga nagtaas ang kaso sang HIV sa Bacolod sa first quarter sang 2026 bangud sa massive testing nga ginapatuman sang Department of Health, apang wala pa matumod ang eksakto nga numero sang mga nagpositibo.*
[sibwp_form id=1]