Isa ang patay kag isa ang pilason sa sunog nga nagluntad sa Purok Maanyag 2, Barangay Alijis sa Bacolod City, pasado las 10 sang gab-i, Miyerkules, Mayo 6.
Na-trap kag nasunog ang 79-anyos nga si alyas "Rosa", samtang nakaangkon sang 1st degree burn sa iya nga likod si alyas "Jose", 62-anyos.
Pahayag ni alyas “Jose,” bana ni alyas “Rosa” nga sila ang naghaksanay pa sang iya asawa matapos nga mabatyagan ang init sang kalayo sa ila palibot. Nagtinguha sila nga makagwa apang may pader nga talaklason.
Antes magbuya si “Rosa”, iya ginhambalan ang iya bana nga luwason ang iya kaugalingon.
Suno sa record sang Bureau of Fire Protection, anum ka mga balay ang naulamid sa sunog. Apat ang totally damaged kag duha ang partially damaged.
Base sa imbestigasyon sang Bacolod BFP, nagsugod ang kalayo sa balay ni Jimmy Barada kag naglupok nga lithium battery sang power bank ang gintunaan sang sunog.
May 15 tanan ka mga indibidwal ang nadulaan sang balay bangud sang sunog nga naglawig sang ginabulobanta 15 minutos.
Yara sa P35,000 ang kahalitan sang sunog sa Alijis.
Samtang, kaina pasado las 2 sang kaagahon, isa pa gid ka sunog ang nagluntad sa Purok Magnolia, 16th-Lacson Streets sa Barangay 7, Bacolod.
Duha ka mga balay kag duha ka sari-sari store ang ginlamon sang kalayo. Nagdangat sa P975,000 ang damages sang sunog.*
[sibwp_form id=1]