Department of Energy ang nagakilala sang tikang nga gina patuman sang Negros Occidental angut sa pag transition padulong sa pag gamit sang Renewable Energy.
Isa naman ka Renewable Energy Company nagsiling nga ang Negros Occidental ang naga panguna sa mga probinsya sa pungsod sa pag-transition sa Renewable Energy bahin sa installed capacity.
Sa speech ni Ruby de Guzman, ang assistant director, Renewable Energy Management Bureau sang Department of Energy sa pagbukas sang Renewable Energy Week Expo sini nga adlaw, iya ginsiling nga sa power generation mix sang pungsod karon, 25.4 percent sini ang Renewable Energy.
Ang national goal suno sa iya nga sa 2030, ang Renewable Energy mangin 35 percent na sa power generation mix. Rason nga daku ang papel sang mga local government units, private investors kag mismo sang komunidad para malab-ot ini.
Suno kay de Guzman ang Negros Occidental ang may estimated renewable potential nga 12,000 MW para sa wind, 1,700 MW para sa solar kag 95 MW para sa hydropower.
Karon, suno sa iya ang Renewable Energy naga account sang 99.2 percent sang Negros Island subgrid co-generation nga equivalent sa 269,000 MW hours sang clean energy nga na produce.
Indi lamang ini mga numero. Nagakasayuran ini sang mga trabaho sa mga komunidad, investment sa mga local economy, mas mabakod nga energy security kag mas matinlo nga palibot para sa masunod nga mga henerasyon.
Sa pihak nga bahin ginkilala man sang WeGen Energy Philippines, Inc ang Negros Occidental bilang naga panguna sa mga probinsya sa pungsod bahin sa Renewable transition in terms sa installed capacity, pending sang official validation. Suno kay Daniel del Rosario, Jr., Sales and Service Partner sang WeGen, sa gin install nga solar panels nila sa anum ka mga building sang Kapitolyo P740,000 ang na save sini sa nagligad nga walo ka bulan. P435 million naman ang ma save sa sulod sang 25 ka tuig bagay nga sarang magamit bilang pondo para sa social services.
25,521 metric tons naman sang carbon dioxide emission sa masunod nga 25 ka tuig ang nalikawan ukon equivalent sa pagtanom sang 420,000 ka mga kahoy.*
[sibwp_form id=1]