May pila ka mga negosyante ang nakabaton sang sulat kag text nga naga unod sang extortion ukon pagpangilkil kasubong man pagpamahug.
Ginpadala sa DIGICAST NEGROS ang kopya sang sulat nga may logo sang Apolinario Gatmaitan Command kag ini ang nagahinyo sang revolutionary tax.
Ang kopya naman sang text message nga ginpadala naga unod sang pagpamahug. Naga siling ini nga padal-an sang sparu kag habuyan sang granada ang natungdan.
Suno sa source sang DIGICAST NEGROS mga negosyante gikan sa Bacolod City kag Kabankalan City ang mga ginpadal- an.
Suno kay Col. Michael Samson ang pamuno sang 303rd Brigade sang Philippine Army ila nga gin-verify ang amo nga sulat.
Peke suno sa iya ang amo nga extortion letter.
Ang mga ginapadala sa masami sang mga rebelde ang may yara sang control number.
Pero bisan pa dapat sa gihapon ini ma-report sa pulis bangud ang pagpangilkil mismo isa ka krimen bisan sin-o pa ang nagpadala sini.
Mahimo mga may pila ka mga indibidual ukon ayhan mga anay katapo man sang rebeldeng grupo nga may ihibalo sa modus ang posible yara sa likod sini.
Samtang, suno kay Samson ang militar nagapabaskog sang ila nga kampanya kontra sa rebelde kag ini ang nagalakip indi lamang batuk sa kalakasan nga gina lunsar sang NPA kundi pati man sa ila nga mga pagpamentaha.
“We would like to assure the people of Negros ginahimo namon ang tanan namon nga mabuhat para madakup kag ma untat ang extortion sang CPP-NPA,” suno kay Samson.