Shadow

Pamilya sang babaye nga gina alegar gin-abduct nagpaathag nga wala sang may natabo nga abduction, ok ang sitwasyon sang 23 anyos nga babaye

Gina-alegar abduction sang babaye sa Barangay Banago sa Bacolod ang indi matuod.

Ini ang ginkumpirmar sang kapulisan matapos nga nagpahibalo ang pamilya sang babaye nga nakapauli na siya.

Naglapta sa social media ang video sang babaye nga ginsipit sang apat ka mga lalaki kag ginsakay sa awto sa Circumferential Road sa Barangay Banago kagab-i.

Pero suno kay Police Station 3 Commander, Police Captain Rondyl Tapang, wala sang may natabo nga abduction.

Ini matapos nga nagpahibalo ang mismo pamilya sang 23 anyos nga babaye nga nakapauli na siya.

Wala na nagpa-record pa sa pulis ang pamilya sang babaye.

Indi na luyag pa ni Tapang nga padalman pa ang nagalapta nga video bangud kun basehan ang mga nakuha niya nga video call kag chat sang babaye sa iya sini nga lolo sang sini lang nga hapon masiling niya nga wala sang krimen nga natabo nga dapat imbestigaran.

Indi niya man makabig nga fake ukon prank ang amo nga video nga para sa iya mas nagakaangay nga mapaathag sang mismo nag-upload sang video kag naghambal nga isa yadto ka kaso sang abduction.

Napat-ud sang kapulisan nga ang babaye nga taga-Barangay 2 ang nangayaw lang kag naglagaw sa Barangay Banago sang amo nga gab-i. 

Secured By miniOrangeSecured By miniOrange