Pagpaiway sang sugar importation sa milling season kag pagbakal sang 50 porsiento sang mga ani sang mga mangunguma ginaduso sang mga senatoriable.
Ang malawig nga tig-ilinit isa sa mga pagtilaw nga naghatag kahangawa sa sugar industry sang nagligad nga tuig.
Dugang pa diri ang pagsarurot sang presyo sang kalamay nga ginapatihan resulta sang ginapatuman nga importation program.
Ginpahayag ni Makati City Mayor kag karon senatorial candidate Abby Binay nga dapat mapasiguro sang Sugar Regulatory Administration nga mapaiway ang sugar importation sa tion sang milling season.
Ini agud mapasiguro nga indi maapektuhan ang presyo sang kalamay.
Ginsiling naman ni anay Senador Vicente Sotto, III nga para mabuligan ang mga mangunguma ilabi na mga sugar farmers, nagakaangay nga ang gobyerno ang magbakal sang 50 porsyiento sang ila mga ani ukon produkto.
Pinaagi diri mapaiway man ang gina-alegar posible nga pagpamentaha sang mga nagaserbe middlemen kag traders.