25 ka mga backyard hog raisers association sa Negros Occidental ang nagbuylog sa Pig Holiday nga ginpanawagan sang Pork Producers Federation of the Philippines.
Ginsiling ni Ric Lauron ang presidente sang Alliance of Hog Raisers Association of Negros Occidental ukon AHRANO nga 25 sa ila nga mga active members ang nag upod sa panawagan sa tuyo nga mahatagan sang atensyon sang gobyerno labi na sang Department of Agriculture ang kahimtangan sang industriya.
Suno kay Lauron nagsugod sang Hwebes nga wala na sila nag baligya sang buhi nga baboy lakip man pag deliver sang karne sa mga merkado.
Sa amo nga tikang mga 200 tubtob 300 ka baboy ang indi ma baligya sa sulod sang duha ka adlaw. Ang pig holiday ang magatapos tubtob sa Sabado.
Isa sa gina tudlo nga rason sang grupo sa nasyonal kag sang AGAP Partylist nga labing naga apekto sa industriya amo ang pag import sang baboy kag smuggling.
Naga sarurot sa karon ang presyo. Ang live weight sa Negros Occidental suno kay Lauron ang yara subong sa P100 tubtob P115 ang kilo. Pierde na ang hog raiser sa amo nga presyuhanay.
Damlag pa, ginsiling sang AHRANO nga apesar sang floor price nga ginapatuman sa probinsya para kuntani mapangapinan ang mga hog raisers wala man ini masunod bangud ang traders sa gihapon ang naga dikta sang presyuhanay.
“Nag take move kita kay gina patihan kag gina lauman gid naton nga may positive result ini especially today nga ining aton nga grupo naga tipon dira sa atubang sang aton nga Department of Agriculture para nga ipahayag ang aton gina pangabay sa aton nga departamento nga mabuligan kita even until the attention of our president,” suno kay Lauron.
[sibwp_form id=1]