May duha na ka tuig nga nagabaligya sang faceshield ang iloy nga si Mary Jane Domingo sa kilid sang Bays Center sa Bacolod.
Sang nagsako ang pagparehistro sang mga voter applicants sa Comelec Office, nagalab-ot man sa tres siyentos ka mga face shield ang iya nga napaubos. Tag beinte singko pesos ang kada isa.
Pero nabalaka siya matapos magdeklarar si presidente rodrigo duterte nga dulaon na ang pag-gamit sang faceshield, sa baylo himuon na lamang nga voluntary kag indi mandatory ang pag-gamit sini.
Pero ginsiling ni Vice Mayor El Cid Familiaran nga ila anay hulaton ang executive order ni Mayor Evelio Leonardia kun dulaon na ang pag gamit sang face shield.
Sa ginpa gwa nga pagsulundan sang National Inter Agency Task Force mangin voluntary ang pag gamit sang faceshield sa mga lugar nga napaidalom sa alert level 3 panubo.
Yara sa alert level 2 ang Bacolod.
Dugang pa ni Familiaran, nagadepende man sa mga commercial establishments ang pagpatuman sang mandatory ukon voluntary nga pag-gamit sang face shield.
Magahulat man ang katapo sang Emergency Operations Center sa mangin tikang sang konseho kun ila ligwaton ang ordinansa sa mandatory nga pag gamit sang face shield sa mga pampubliko nga lugar.
Ini bisan pa nagapati man sila nga may dako nga bulig ang pagsuksok sang faceshield agud bisan paano mapunggan ang paglaton sang virus.
Ang mag-abyan nga sanday Rodniel Blanca kag Dave Alibuga, nagsiling nga pabor man sila kuntani sa pag-gamit sang faceshield. Ugaling magasto na para sa ila kag indi sila komportable sa pag-gamit sini.
Samtang nagahulat sang mangin tikang sang siudad ang mga kasubong ni Mary Jane nga sidewalk vendor, naga plano na siya nga buhinan na ang iya gina-alsada nga faceshield.
Kun mangin requirement naman ini sa gihapon sa mga commercial establishment pareho sang mga mall, nagalaum ang EOC nga kuntani seryosohon ang ensakto nga paggamit sang faceshield nga amo ang ginakabig dugang nga panaming kontra sa virus.