Pagbisita sa mga lugar nga nasakpan sang Northern Negros Natural Park ang temporaryo nga ginadumilian makaligad sang halit sang Bagyo Odette.
Masako gihapon ang ginapatuman nga clearing operation sang barangay upod sa local government sang siudad sang La Carlota sa mga dalanon nga nabalabagan sang nagkalatumba nga puno sang kahoy.
May mga nautod pa nga kahoy kag mga linya sang kuryente nga ginahimus halin sa Barangay Ara-al, San Miguel pasaka sa guintubdan.
Bangud may mga puno man sang kahoy nga nagkalatumba tuga sang Bagyo Odette sa sulod sang nasakpan sang Northern Negros Natural Park, ginpakamaayo sang mga nagabantay sang park nga indi anay tugutan ang mga nagabisita nga makasulod kag makapaliwa-liwa sa mga busay.
Bisan sa siudad sang Silay, ginahaylo man ni Mayor Mark Golez ang mga dumuluong nga ipaiway anay ang pagsulod sa nasakpan sang nnnp ilabi na sa nabukid sang barangay patag samtang masako pa ang clearing operation.
Ini agud man mapaiway ang posible pagluntad sang disgrasya.
Ang mga tour guide nga katapo man sang Bantay Bukid amo man karon ang nagatinguha nga makuha ang mga puno sang kahoy nga nagasablag sa mga alagyan.