Ceremonial vaccination sang mga medical frontliners sang nagkalain-lain nga mga district hospital sa Negros Occidental ang ginpatigayon sini nga hapon.
Ginhiwat ang COVID-19 ceremonial launching sa Teresita L. Jalandoni Provincial Hospital kun sa diin dose tanan ka mga health care workers gikan sa amo nga ospital, Cadiz District Hospital, Lorenzo Zayco District Hospital kag Valladod District Hospital.
Nagtambung sa kahiwatan si Governor Eugenio Jose Lacson, ang provincial consultant for economic affairs nga si anay congressman Albee Benitez, DOH Assistant Secretary Paz Corales kag Silay City Mayor Mark Golez.
Nangin dinapit nga bisita si Secretary Vince Dizon ang COVID-19 testing czar kag deputy chief implementer sang National Task Force against COVID-19.
Iya ginpasalamatan ang mga health care workers sa ila sakripisyo kag pagrisgo sang ila kabuhi para mag atipan sa mga pasyente sa tunga sang pandemya.
Ginkumpirmar man ni Dizon nga may maabot nga supply sang AstraZeneca para sa Bacolod kag Negros Occidental bwas nga adlaw.
Ang bakuna ang kabahin sang 1,600 ka mga doses sang Sinovac nga gikan sa Department of Health.
Natalana ang roll out sang bakuna sa onse ka mga district hospitals sa probinsya sa Sabado.