Matapos nga matukiban ang isa ka warehouse sa Barangay Alijis nga may linibo ka mga karton kag sinako nga raw materials sa pag-ubra sang mga peke nga sigarilyo, ginahatagan na sa karun sang Bacolod City Permits and License Office sang daku nga pagtamod ang pag-usisa sa mga warehouse sa siudad.
Ginsiling ni Mayor Greg Gasataya nga padayon na nga nagalibot ang BPLO agud usisaon kon may mga permit gid man ang mga warehouse nga nahamtang sa Bacolod.
Ini bangud natukiban man sang siudad nga ang warehouse nga may mga unod sang materyales sa pag-ubra sang peke nga sigarilyo ang wala sang permit to operate.
Suno sa alkalde, nakilala na nila ang tag-iya sang amo nga warehouse, apang wala pa ini ginhingadlan sa publiko bangud nagapadayon pa ang imbestigasyon.
May permit ang kompaniya, apang wala nadala sa ila permit nga may gina-operate sila nga warehouse sa Barangay Alijis.
Sandig sa imbestigasyon sang siudad, ang amo nga warehouse ang ginpatukod sadtong tuig 2022 tubtob 2024.
Padayon pa sa karon ang pagpang-usisa sang siudad kon kompleto ang dokumento sang amo nga kompaniya.*
[sibwp_form id=1]