Liwat nga ginmanduan sang Department of the Interior and Local Government Bacolod City ang mga barangay sa siudad nga i-post sa ila social media pages ang mga pangalan sang lima ka mga benepisyaryo sang Presidential Scholarship Porogram nga nakabaton sang 20,0000 pesos.
Ini matapos nga naglapta sa social media ang isa ka dokumento kun sa diin ginapatihan nga nalakip ang pangalan sang bata sang Barangay Secretary sang Punta Taytay sa mga scholars.
Ginsiling ni DILG Bacolod City Director Christian Nagaynay nga sang validation period palang ila na ginpakakas ang bata sang secretary sa listahan kag ginpaislan na ini.
May pila man ka reklamo ang mga residente sang Barangay 40 sa social media parehas sa amo nga isyu, apang ini ang wala pa mapamatud-an suno sa DILG.
Padayun ang pagpakig-angut sang DILG sa mga barangay agud mabantayan ang pag distribute sang scholarship.
Ginklaro man ni Nagaynay nga tanan nga mga barangay ang ginmanduan na sang validation period palang nga islan na nga daan ang mga pangalan nga may problema sa guidelines.
Wala man suno kay Nagaynay nakasaad sa guidelines nga indi pwede makabaton ang mga himata sang opisyal sang Barangay, apang ini ang hugot nga gina-discourage sang DILG agud malikawan ang conflict of interest.
Sa karun, wala sang formal complaints nga nagdangat sa DILG may angut sa piniliay sang Presidential Scholars.
Sandig sa pagsulundan sang gobyerno nasyonal, kinahanglan nga graduating ukon working student nga may pinansyal nga kabudlayan ang isa ka benepisyaryo agud mangin kwalipikado ini sa programa.
Sa isa ka Facebook post, ginklaro naman sang Punong Barangay sang Punta Taytay nga si Cliff Orland Palma nga nagsunod ang Barangay sa guidelines sang DILG kag nakasulod sa criteria ang tanan nga mga napilian.
Ginpakigbahin man sang Kapitan ang opisyal nga listahan sang mga benepisyaryo kun sa diin wala na nadala ang pangalan sang gina-alegar bata sang secretary. Amat-amat nan ga gina-release sang Barangay ang cash assistance para sa mga scholars.
“We are actually saying nga te ang pag discourage sina tungod nga te ang isa sina is conflict of interest. Ang isa, ginpaagi siya dapat gid sa proseso kay te the guidelines may ara ginbutang nga specific criteria. May ara man kita nga occasion nga sa gagmay nga barangay may mga wala nagid man maka fall didto sa criteria, te subject ina sa ila nga pag-asses. The guidelines provide nga dapat ipaagi nila sa ila committee on education kag dapat ang proseso sang pagpili nangin open and transparent sa ila nga barangay”, suno kay Nagaynay.
[sibwp_form id=1]