Air quality sa banwa sang La Castellana ang nag lab-ot sa ‘acutely unhealthy’ level.
Samtang air quality sa Bacolod ang yara sa ‘very unhealthy’ level kag sa La Carlota naman yara ‘unhealthy for sensitive groups’.
Ini base sa monitoring report sang Environmental Management Bureau, 8am, subong nga adlaw.
Pero, sa 12nn nga monitoring nanaog sa ‘unhealthy for sensitive groups’ nga level ang Bacolod kag La Castellana kag nangin fair na ang sa La Carlota.
Paathag ni Vicente Losbañes ang regional director sang EMB ang pag classify sang levels sang air quality naga depende sa measurement sang presensya sang particulate matter 2.5 nga yara sa hangin.
Nagatumod ang particulate matter 2.5 sa tuman ka pino nga yab-ok ukon higko sa hangin tuga sang ayhan aso dala sang haze kag iban pa.
Tuman ka pino ini, nga kun iginhawa sang isa ka tawo maga derecho na sa iya nga baga suno kay Losbañes. Ang sa ‘acutely unhealthy’ level ang particulate matter yara sa 201-300, ang ‘very unhealthy’ yara sa 151-200 kag ang ‘unhealthy for sensitive groups’ nga level yara sa 101-150.
“Particulate matter 2.5 amo ni siya ang pinaka pino nga yab-ok, once nga mag inhale ka or maghaklo naga derecho na na sa imo lungs. That’s why ma classify naton na siya nga unhealthy. Damo na na nga factor ang haze abi nga naga halin subong sa Indonesia may ara na siya nga dala nga mga abo like sa aton nga Kanlaon volcano, mag buga na siya may particulate matter nga dala”, suno kay Losbañes.
Rason nga suno kay Losbañes ang mga may sakit sa baga kag korason ang gina abisuhan nga mag mask kag ipa iway na ang pag gwa sa tagsa ka mga balay labi na sa mga lugar nga may kasubong nga mga air quality index level.
Sa banwa sang La Castellana suno kay Mayor Añejo Nicor, gina abisuhan nila ang pumuluyo nga mag mask. Pero, paathag sang EMB ang pagsaka sang particulate matter sa hangin sa La Castellana indi man lamang tuga sang ginapatihan haze gikan sa Indonesia, ang pag buga sang bulkan Kanlaon nag attribute man sa higko sa hangin sa lugar.
“Gina disseminate ang information nga dapat maghalong. Halos tanan nakabalo naman na sila nga dapat maghalong. Wala pa natabo subong kami ya naga alarm na to use face mask in every barangay kay te pirmi galupok ya ang Kanlaon namon”, suno kay Nicor.
Pila na ka adlaw nga indi gani makita ang bulkan Kanlaon tungod sang daw pag guom ukon fog suno kay Nicor.
Suno sa EMB ang pag guom sa palibot ang tuga sang haze kag indi man lamang ini diri sa probinsya.
[sibwp_form id=1]