Ginpapanaugan sang Bacolod LGU sang showcause order ang anay pamuno sang Bacolod Environment and Natural Resources Office ukon BENRO nga si Maria Fe Tresfuentes bangud sa ginapatihan “conflict of interest” samtang nagapungko ini bilang BENRO Head kag nagatransakyon sa IPM-CDC nga anay garabage collector sang siudad.
Ginsiling ni City Legal Officer Karol Joseph Chiu nga sang Setyembre 1, ginhatag na sa natungdan ang showcause order. Nakasaad sa showcause nga may gina-alegar financial interest ang natungdan sa mga transakyon sang iya talatapan sa IPM-CDC.
Suno kay Chiu, nahibaluan man nga ang bata ni Tresfuentes direkta nga nagaobra sa IPM-CDC.
Kadungan sini, ginpapanaugan man sang showcause order ang isa ka lalaki nga regular employee sang BENRO matapos nga ginreklamo ini sang isa ka resort sa Barangay Alangilan nga fixing.
Nag-ugat ang reklamo sang isa ka resort matapos nga ginpangakuan ini sang natungdan nga empleyado nga siya na mahikot sang ila nga Environmental Compliance Certificate para sa resort, apang wala ini natuman.
Nakabayad na sang 10,000 pesos ang nagareklamo paagi sa online payment, apang wala man mahatag sa iya ang mga dokumento.
Isa pa sa ginapasabat sang siudad sa natungdan amo ang irregularities sa position sang isa ka empleyado. Sa idalum sang administrasyon sang anay BENRO Head, na promote ang natungdan nga empleyado gikan sa Salaray Grade 1 padulong Salary Grade 15.
Suno kay Chiu, hugot nga ginapatuman sang administrasyon ni Bacolod City Mayor Greg Gasataya ang good governance, kag lakip diri ang pagtapna sa mga iligal nga aktibidad sang mga empleyado.
Lima ka adlaw ang ginhatag sang siudad sa duha ka natungdan agud maghatag sang ila nga bahin.
Gintinguhaan man sang Digicast Negros nga makuhaan sang bahin ang anay pamuno sang BENRO, apang wala pa ini makasabat as of press time.
[sibwp_form id=1]