Operation sang ginakabig illegal structures sa ginsang-an sang Pahanocoy Creek natalana papanaugan sang Cease and Desist Order ukon CDO.
Wala sang na issue nga resolution of no objection ang Barangay Pahanocoy Council sa fish port project sang pamilya Tacolod, amo nga natingala sila kun ngaa naga sige ang operation sang ginakabig illegal structure sa ginsang-an sang Pahanocoy Creek.
Suno kay Punong Barangay Yolanda Noble ang fish port kag ang pag reclaim sang portion sang baybay ang ginapatihan sang barangay nga rason sang pag-anaw sa pila ka mga kaiping nga purok sang tinalikdan nga pagbunok sang ulan sang Setyembre.
Wala sang may nagtambong nga tiglawas sang pamilya Taculod sa hearing nga ginpatawag sang konseho.
Suno kay Councilor Jude Thaddeus Sayson may kaso naman nga ginpasaka ang Barangay Sum-ag batuk kay Engineer Andre Taculod angut sa pagsupak sang Forestry, Water kag Fisheries Code.
Sang 2021 naka-issue man ang City Legal Office sadto sang CDO batuk sa pag-operate sang fish port kag ginatukod nga mini-port.
Gani ang konseho ang liwat man nga maga recommend sang issuance sang CDO sa operation sang ginakabig illegal structures.