203.8 million pesos nga balor sang pondo nga ginhinyo sang apat ka mga LGU sa Negros Island Region nga apektado sang bulkan Kanlaon ang aprobado na sang presidente.
Ini suno kay Office of the Civil Defense Administrator, Undersecretary Ariel Nepomuceno nga nagsiling man nga ang pag download sang amo nga kantidad mahimo pag katapos na sang eleksyon.
Sa press conference sa Bacolod City sini nga Hwebes, iya ginsiling nga mga duha ka semana ang nagligad sang gin-aprobahan ni Presidente Ferdinand Marcos, Jr. ang pondo nga ginhinyo sang mga banwa kag siudad nga apektado sang bulkan Kanlaon.
Ang Himamaylan City ang may 62.5 million pesos nga request.
Yara sa Himamaylan City ang Tent City nga amo ang ginhanda para mag accommodate sa mga evacuees enkaso nga magsaka sa alert level 4 ang bulkan kag ma pa lapad sa 10 kilometer ang danger zone.
Ang La Carlota City ang may 63.097 million pesos nga request, La Castellana 48.5 million pesos kag Canlaon City sa Negros Oriental 29.7 million pesos.
Ginsiling man ni Nepomuceno nga ang bahin sa pag gasto ukon disburse sang amo nga pondo ang maga depende sa kun ano ang pagsulundan sang Commission on Elections.