Hwebes sang hapon sang ang Commission on Elections kag Office of the Civil Defense ang naglagda sang Memorandum of Agreement para sa isa ka partnership sa tuyo nga mapasiguro ang safe elections sa tunga sang sitwasyon sang bulkan Kanlaon.
Sa record sang Commission on Elections sa alert level 3, may 24,362 ka mga bumuluto gikan sa La Castellana, Bago City, La Carlota, Pontevedra, Murcia kag Canlaon City ang apektado kag kun magdangat sa Alert Level 4 magasaka ini sa 113,461.
Ang partnership sang OCD kag COMELEC ang naga pasiguro sang sulhay kag safe nga piniliay.
Personal nga nabisita si Garcia sa mga internally displaced individuals sa South Elementary School II sa iya nga pag-abot Hwebes sa aga sa La Carlota City.
May ginpatuman man nga demonstration sang voting process lakip na ang pag paathag sang pag function sang Automated Counting Machines.
Paathag ni Garcia tanan nga pamaagi ang ipatuman sang COMELEC para lamang tigayon nga makaboto ang mga apektado bangud ini ang kabahin sang ila nga kinamatarong.
Samtang, ginsiling naman ni Office of the Civil Defense Administrator, USec Ariel Nepomuceno nga padayon pa nila nga gina plastar ang iban nga logistics labi na ang pag transport sa mga bumuluto.
Indi resources sang LGU ang paga gamiton sa pagdala sang mga bumuluto. Ginsiling naman sang COMELEC nga may ACM sa kada satellite precinct nga ila ipahamtang para sa mga apektado nga botante.