Padayon nga ginaduso ni House Deputy Speaker kag Bacolod City Lone District Representative Alfredo Abelardo Benitez ang pag fully digitalize sang mga systems sang siudad paagi sa pag patuman sang Super City program projects kaupod ang High Data Infrastructure Corporation .
Isa diri ang Geographic Information Systems ukon GIS kun sa diin sarang na nga ma-isip kag ma -map sang isa ka satellite kun pila ka mga buildings ang yara sa karun sa Bacolod City .
Ini ang mangin basehan sa pag kolekta sang Real Property Tax ukon RPT. Sa rekord sang City Assessor's Office, yara lang sa 80,000 ang na register nga mga buildings sa ila system, apang sa nakita sang satellite, may 160,000 gali ka mga buildings ang yara sa Bacolod.
Suno sa kongresista, katunga sang mga establishments kag properties sa siudad, wala nagabayad sang real property tax bangud wala sila sa system sang siudad. Dugang niya, kun ma fully-implement na ang GIS, sarang ini nga makadugang sang 1 billion pesos nga RPT collection sa siudad kada tuig.
2.1 billion pesos ang kinahangan bayaran sang siudad sa High Data Infrastructure agud mapatuman ang proyekto. Ginklaro man niya, nga sa karun, wala pa sang may ginabayadan ang siudad sa High Data.
May 150 naman ka mga CCTVs ang plano nga ipahamtang sa mga mayor nga dalan sang Bacolod, sa idalum sang nasambit nga proyekto.
[sibwp_form id=1]