
Bacolod LGU maga-construct sang onsite housing project para sa mga nasunugan nga pamilya sa Purok Kagaykay sa Barangay 2.
Nakit-an ni Mayor Albee Benitez ang peligroso nga kahimtangan sang mga nasunugan nga pamilya sa iya pagbisita sa Purok Kagaykay sa Barangay 2.
May mga pamilya nga karon amat-amat nga nagabalik sa ila gin-istaran.
Pero indi ini luyag sang alkalde tungod maka-apat na ka beses nga nagluntad ang sunog sa amo nga lugar.
Gani iya ginmanduan ang City Engineer’s Office para masuguran ang ginaplano nga onsite housing project sa ginkabig red zone ukon fire prone area.
Naglab-ot sa 81 ka mga balay ang gintupok sang kalayo sang nagluntad ang sunog sa Barangay 2 sang Hulyo 31.
Gindugang niya nga ang housing project ang mangin basehan sang masunod pa nga mga onsite housing project ilabi na sa mga red zones nga masami gina-istaran sang mga illegal settler families.
Sa record sang natukod nga red zone task force nagalab-ot na sa 280 ka mga purok sa Bacolod ang makabig fire prone area.