Sa video nga ginpadala sang Roselyn Jean Pelle command sang New People’s Army sa Digicast Negros makita ang aktwal nga pagsunog sa mga backhoe Lunes sang gab-I.
Base sa statement ni Cecil Estrella, ang spokesperson sang grupo, ila gin silotan ang quarry operation ni Mayor Mark Golez sang Silay City bangud sang ila nga gina alegar halit sini sa palibot nga nag resulta sa pagbaha sa siudad.
Sa statement sang grupo, ila gina alegar nga naga gamit sang iya impluwensya ang alkalde para maglapas sa manubo nga standards sang gobyerno sa environmental compliance. Kaupod kuno sang alkalde ang iya nga mga business partners sa pagpangutkut sang balas kag bato.
Gina siling sang grupo nga ang amo nga quarry site ang nahamtang sa Hacienda Vista Alegre, Barangay E. Lopez sa Silay City pero damlag pa gin pahayag sang PNP nga ang amo nga lugar ang sakop na sang Sitio Buenos Aires, Barangay Consing sa EB Magalona.
Paathag ni Mayor Golez, indi iya ang mga ginpang sunog nga equipment kag indi man siya ang quarry operator kag wala man siya gani sang may gina padalagan nga negosyo nga quarrying.
Sa report sang PNP, ang mga backhoe ang gina panag iyahan nanday Kokie Benedicto kag Ryan Villan.
Sa record sang Environment and Natural Resources Office sang EB Magalona, naka pangalan kay Jaime Golez ang quarry operation sa amo nga lugar. Suno sa kay Mayor Golez, kun may negosyo ang iya nga amay sa banwa sang EB Magalona, iya ini personal nga negosyo kag wala siya naga pasilabot.
Na alarma ang alkalde sa amo nga insidente kag iya gina kondena ang iya ginakabig nga pintas kag bayolente nga buluhaton sang grupo.
Martes ang gab-I sang ginpang sunog ang tatlo ka mga backhoe sa lugar. Suno sa mga residente, may gin set up nga check point ang may kapin sa 30 ka armado nga grupo malapit sa lugar sang natabu-an sang pagsunog.
Para sa rebelde nga grupo, sa natabo nga pagpang sunog, natagaan na nila sang hustisya ang mga ginbaha sadtong Enero uno.
Pero suno kay Golez, indi ang quarrying ang dapat basulon sa natabo nga pagbaha kay kada napulo ka tuig gina baha ang silay tuga sang climate change nga ang may kahimuan, mga tawo.