Banwa sang Hinoba-an ang nag-cancel sang klase sini nga Lunes nga adlaw, Hunyo 22, bangud sang mabunok nga ulan. May lima naman ka eskwelahan sa Sipalay City ang nag-cancel man sang klase sini nga adlaw.
Sa video ni Ai Aumentar kuha 9:16 Lunes sang aga, indi makatabok sa overflow sa Brgy San Rafael sa Hinoba-an, bangud sang makusog nga daludo sang tubig.
Suno kay Mayor Daph Reliquias nag awas ang overflow pero kun may pagbunok sang ulan, masami nga naga awas gid man ini. Nag cancel sang klase suno sa iya para sa safety sang kabataan. Wala naman sang may gin-report nga pagbaha sa banwa suno sa alkalde.
Sa Sipalay City, lima ka mga eskwelahan suno kay Dionilo Bogtae sang Sipalay CDRRMO ang nag-suspend sang klase bangud man sang epekto sang mabunok nga ulan.
Ginsiling ni Irene Bel Ploteña, Provincial Disaster Risk Reduction Management Officer sang Negros Occidental ang mabunok nga ulan sa probinsya sa pila ka lugar kaangay sa Hinoba-an kag Sipalay ang tuga sang localized thunderstorms. Sang weekend suno sa iya nangin maulanon.
Ang local forecast para sa Negros Occidental ang magal-umon nga may pag-ulan kag pag panaguob dala sang Southwest Monsoon.
Samtang, bagyo Francisco as of 4pm ang yara sa 525 km east sang Tuguegarao City, Cagayan.
Malapit na ini nga mangin super typhoon.
May maximum sustained winds ini nga 175kph kag pag madlos mga 215kph.
Padulong ini west northwestward sa 20 kph.
Maga lab-ot sa peak intensity nga 185 kph ang bagyo sa Martes bag-o ini mag liko malapit sa Batanes-Babuyan area.
Yara sa wind signal no. 1 ang Batanes kag northeastern Cagayan, lakip ang eastern Babuyan Islands.
Sa Biyernes, Hunyo 26, posible maga gwa sa Philippine Area of Responsibility ang bagyo.
[sibwp_form id=1]