
Ginakondenar sang Armando Sumayang, Jr. Command sang New People’s Army Southwest Negros Guerilla Front ang gin-report nagluntad nga engkwentro sa tunga sang rebelde kag army sa Brgy. Tabugon siudad sang Kabankalan sang nagligad nga semana.
Suno sa kay Ka Andrea Guerrero, ang spokesperson sang Armando Sumayang, Jr. Command ginapagwa lang sang militar nga isa ka engkwentro ang nagluntad para matabunan ang matuod-tuod nga natabo nga isa ka massacre.
Ang mga napatay tatlo ka medical personnel sang NPA nga amo sanday Ka Rekoy (Bobby Pedro), Ka Goring (Mario Mullon) kag Ka Joyce (Janice Flores) upod ang naka-medical leave nga sila Ka Bravo (Alejo delos Reyes) kag iya asawa nga si Ka Diane (Melissa dela Peña) nga anum ka bulan nga nagabusong, samtang ang tricycle driver nga sibilyan amo si Robin Gaitan.
Duda sang NPA mga posible ginpang finishing pa ang mga biktima matapos nga ginpa ulanan tiro sang army.
Suno pa sa NPA klaro nga paglapas sa International Humanitarian Law ilabi na ang sa Geneva Conventions of 1949 and their Additional Protocols, ang ginhimo sang army.
Damlag pa ginsiling sang Philippine Army nga nakabaton sila sang impormasyon nga may presensya sang mga katapo sang NPA sa lugar nga naga pangilkil amo kun ngaa nagpadulong didto ang mga soldado gani natabo ang engkwentro.
Ginhatagan naman sang NPA sang pagsaludo ang pagkapatay sang ila mga kaupdanan nga ila ginakabig nga mga baganihan.