Bukas sa ano man nga sahi sang audit sa iya mga proyekto si House Deputy Speaker kag Bacolod City Lone District Representative Alfredo Abelardo Benitez, gani personal man nga naghatag sang sulat ang kongresista sa Commission on Audit para liwat nga ma-imbestigahan ang mga nasambit nga proyekto sang siudad.
Suno sa kongresista, wala man siya sang dapat nga itago, gani mas maayo nalang nga i-audit liwat sang COA ang tanan agud maathagan ang publiko kag ang mga naga-critic sa iya pagpamuno sang Bacolod City.
Dugang niya, pila sa mga proyekto sa idalum sang iya administrasyon bilang alkalde sang Bacolod ang natalana na nga iginagurahan sa masunod nga semana lakip na ang City Health Complex.
Nangin kontrobersyal ang mga proyekto ni Benitez matapos nga ginduso ni Councilor Homer Bais sa Sangguniang Panlungsod ang pagpatuman sang special fraud audit sa 515 million pesos nga legislative building nga ginpatukod sang administrasyon sang anay alkalde nga si Benitez.
Sini nga hapon, personal man nga ginlibot sang kongresista ang amo nga building kag nagsiling nga may mga opisina sa sulod sang building nga nahuman na. Sa pinakaulihi nga impormasyon yara palang sa 51 percent ang completion sang building nga kuntani sang Setyembre pa natapos.
Nagapati man si Benitez nga may lamod nga pulitika ang mga pag-critic sa iya mga proyekto, ilabi na nga nagahilapit na ang 2028 elections.
Amo man sini ang panindugan nanday Councilor Al Espino kag Caesar Distrito matapos nga suno sa ila naggwa naman ang resulta sang comprehensive review sang SP nga nagapamatuod nga wala sang fraud ang mga proyekto. Bagay nga gin-almahan man ni Councilor Bais nga nagpabutyag sang indi pagka kumbinsido.
[sibwp_form id=1]