Para sa September nga billing, nag anunsyo ang Negros Occidental Electric Cooperative ukon NOCECO nga may pagsaka sa bili sang kuryente.
P1.48 per kilowatt hour ang isaka sa bili sang kuryente bangud man sang pagmahal sang transmission kag generation charges.
Ang National Grid Corporation of the Philippines ukon NGCP ang nagpasaka man sang ancillary service charges nga nagresulta sa masobra sa 60 sentimos nga saka sa transmission charges.
Nagahulat na lang karon ang NOCECO sa approval sang Energy Regulatory Commission para sa ila bag-o nga power supply contract para mabuhinan ang ila pagsalig sa spot market kag mapahagan-hagan ang saka sa bili sang kuryente sa palaabuton.
Wala pa sang announcement halin sa Negros Power kag Northern Negros Electric cooperative kun magapasaka man sila sa bili sang kuryente.