Anum ka mga purok sang Barangay Handumanan ang mangin pilot areas para sa “No Segregation, No Collection” program sang Bacolod City LGU sumugod sa Nobyembre.
Ginsiling ni Mayor Greg Gasataya, nga una nga gin-propose sang Handumanan ang amo nga inisyatibo kag ginbaton man ini sang siudad.
Paagi sa pag panugod sang amo nga programa sa anum ka mga purok, ginapaabot sang siudad nga mahibaluan kun sarang gid man mapatuman sang insakto ang programa.
Dugang pa sang alkalde, kun mangin epektibo, ginapaabot nga makabulig ini agud mas mangin malawig ang pag-gamit sa landfill bangud naka segregate na ang mga basura.
Makapila naman ka beses nga gintestingan ini patuman sang siudad, apang suno kay Gasataya madamo sang pag panghangkat nga gin atubang ang programa parehas sang consistency kag pagsunod sang mga residente.
Ginapangabay man ang mga pumuluyo nga mag buylog agud mangin madinalag-on ang pagpatuman sang inisyatibo.
Sa karun, sandig sa report sang Bacolod Environment and Natural Resources ukon BENRO, yara sa 1,700 cubic meters sang basura ang ginahakot sang ISWIMS sa bilog nga siudad kada adlaw.
[sibwp_form id=1]