Negros Occidental ang nag record sang isa ka positive pertussis case. May onse naman ka suspected pertussis cases sa probinsya.
Suno kay Negros Occidental Governor Eugenio Jose Lacson, base sa resulta nga nag-abot gikan sa specimen nga gin padala sa Research Institute for Tropical Medicine, nagpositibo sa pertussis ukon kilala man nga whooping cough ang duha ka bulan nga lapsag nga babaye nga damlag pa na admit sa ospital sa Bacolod. Pero, nag-ayo na ang bata kag na ka gwa na sa ospital antes pa man nag gwa ang resulta.
Ginsiling naman ni Provincial Health Officer, Dr Girlie Pinongan nga ang onse ka suspected pertussis cases sa probinsya ang naga pang-edaran duha ka bulan tubtob onse ka tuig. Apat sa onse ang na-admit sa ospital kag pito ang yara sa home isolation. Siyam sa may suspected pertussis cases mga lapsag kag ang duha mga school age children.
Naga haylo ang gobernador sa publiko nga mag gamit sang face mask labi na sa mga lugar nga may madamo sang tawo. Dapat suno sa gobernador nga mahangpan sang publiko nga ang pertussis indi ordinaryo nga ubo kag ini ang labing makalalaton. Suno kay Lacson, makabig nga maka alarma ang pertussis case karon bangud sadto wala na sang may na-record nga cases kag subong nagbalik kag indi lamang sa probinsya kundi sa iban man nga bahin sang pungsod. Damlag pa nag-deklara na ang Iloilo City sang state of calamity bangud sang pertussis.