May estimated 3 million ka cubic meter sang lahar deposit sa karon sa bulkan Kanlaon.
Ini suno kay Negros Occidental Governor Eugenio Jose Lacson nga nagsapol Lunes sang aga sa Task Force Kanlaon nga gina pamunuan ni OCD Western Visayas Regional Director Raul Fernandez upod ang mga alkalde sang mga apektado nga LGU.
Ginsiling sang gobernadaor nga peligroso sa amo nga sitwasyon ang pagbubo sang mabunok nga ulan nga maga tuga sang lahar flow nga kun matabo tuman ka daku sang ma apektuhan.
Pero sa karon suno kay Lacson, ginkasugtan nila nga magapabilin sa status quo ang 6 kilometer extended danger zone basta ipasiguro nga cleared ang natungdan nga area.
Sa karon ang resources sang probinsya nga gikan sa quick response fund ang sarang maka cover sa sulod sang isa ka bulan nga operation ukon tubtob sa ika duha nga semana sang Enero.
Gina pasalig nila ang mga apektado, labi na ang banwa sang La Castellana sang amo nga bulig.
Naka bakal na ang probinsya sang portalets, food provisions kasubong man kagamitan para sa community kitchen.
May gina paabot man nga bulig gikan sa Malacanang para sa apektado sang Kanlaon sini nga semana suno kay Lacson.
Sa adlaw sang Paskwa maga bisita mismo ang gobernador sa mga evacuees.
Sa karon may 8,486 ka evacuees nga yara sa mga evacuation center kag 209 naman nga yara sagwa sang mga evacuation center.