May masobra sa 2,000 ka mga pamilya sa northern Negros ang apektado sang mabunok nga ulan tuga sang shearline kag Tropical Cyclone Romina.
Sa 11am nga report sang Provincial Disaster Risk Reduction Management Office, may 6,180 ka persona ang apektado sang mabunok nga ulan, 2,990 naman ka persona ang gin-evacuate.
May pagbaha sa Cadiz City kun sa diin may 2,338 ka persona ang gin evacuate.
Naga abiso si Mayor Salvador Escalante, Jr sa mga nag evacuate nga indi anay mag balik sa ila na mga puluy-an tubtob may clearance bangud gina paabot ang pag ulan pa gid.
Isa sa mga gina lantaw nagtuga sang pagbaha sa isa ka lugar amo ang pagdabong sang mga nipa bangud wala na na harvest suno sa kay Escalante.
Iya gina pasalamatan ang iban pa gid nga rescue units nga nagbulig sa ila.
Sa Manapla naman, may 514 ka persona ang nag evacuate, 72 naman ang yara sagwa sang mga evacuation centers.
Sa Victorias City may 37 ka persona ang gin-evacuate pero ini sila ang nakapauli na.
Sa Sagay may pre-emptive evacuation sa 29 ka persona kag ini sila ang nakapauli naman.
Suno kay Governor Eugenio Jose Lacson nag handa na sang food packs ang Provincial Social Welfare and Development Office sa Manapla kag Cadiz.
Antes pa man sang Domingo may pagtupa na sang ulan sa pila ka bahin sang mga apektado nga lugar.