Shadow

Nagkalain lain nga sector, may lain-lain nga panindugan sa quarantine status sang Bacolod

Antes lang gid magsugod ang pandemic nag sugod man ang ini nga Blind Massage Center sa East Center sang Bacolod.

Suno sa kay Shella Barnueva ang in charge sang massage center ang ila gina ganar sa kada adlaw sa sulod sang isa ka bulan intsaktuhan lang maka bayad sang bulanan nga renta sa building kag pang adlaw adlaw sang mga massage therapist nga mga bulag.

Sila lang sang mga therapist ang nag amot amot para mapatukod ang ini nga massage center.

Gani sang gab-i sang pag anunsyo sang gobyerno sang mangin quarantine status sang Bacolod naga hawat hawat man ang ila pang ginhawa kay kabalo sila nga kun ipaidalom sa modified enhanced community quarantine ang Bacolod, maga sirado na naman sila.

Kun mag sirado sila, sa ayuda lang sila naga salig.

Gani ginkalipay nila nga magapabilin sa modified general community quarantine ang Bacolod.

Ang probinsya sang Iloilo kag Iloilo City pati na ang Negros Oriental ang ginpaidalom sa MECQ kag ang bacolod kag Negros Ocidental lang nga natung-an sang duha ka mga probinsya ang nagapabilin sa MGCQ.

Sa statement nga ginpadala sang Philippine College of Physicians Negros Occidental chapter ang luyag lang man kun tani nila duha ka semana nga time out ukon paglimita sa giho sang tawo para mapunggan ang latnanay sang Covid-19. Ini para man mabakantehan anay ang mga ospital nga puno na.

Saksi sila sa pag antus kag pag tinghua nga mabuhi pa sang mga pasyente nga gina dala sa
ospital sa kada adlaw.

Suno sa kay Dr. Ronel Sario, ang presidente sang Philippine College of Physicians-Negros Occidental chapter nagsugod ang pagsaka sang kaso tunga tunga sang bulan sang marso kag ang ginhalinan, bulang, mga pagtililipon kag bisan pa sa mga ulubrahan. Wala na masunod ang minimum health protocol. Wala sila naga untat sa pagpanawagan sang kooperasyon.

Pero ang ini tanan panawagan lang sang nagkalain lain nga sector. Medical sector kag ang sector sang mga mamumugon nga naga salig sa kada adlaw.

Ang desisyon sa kun ano ang nagaka dapat ang yara sa kamut sang gobyerno.

Pero ang disiplina naga depende na sa kada isa.

Leave a Reply

Your email address will not be published. Required fields are marked *

Secured By miniOrangeSecured By miniOrange