Humalin sang Lunes, nagsugod na ang pagpangbakuna para sa Covid 19 sa mga kabarangayan sa Bacolod.
Sa Barangay Montevista, madamo sa mga residente nga nakaparehistro kag nalakip sa A1 tubtob A3 category ang nagpadulong sa gym para makahingabot sa supply sang bakuna.
Ang clinic staff nga si Pinky Braganza nga nagbaton sang iya nga first dose sang Sinovac, nagduha duha pa sadto nga magpabakuna kay may hypertension.
Ginpaiway naman anay sang barangay tanod nga si Larry Garcia ang pagpabakuna bangud on duty siya sang ginpatigayon ang vaccination.
Nagapabilin nga ginakulang ang supply sang bakuna sa Bacolod nga naga depende man sa ginapadala sang Deparment of Health.
Gani wala man ginatugutan sang pila ka mga barangay ang mga walk-in.
Samtang, bangud man sang kakulang sang supply sang bakuna..pagahatagan sang prayoridad sang negros occidental provincial government ang mga banwa kag siudad nga naka-preparar na para sa simultaneous vaccination sa sini nga Huwebes tubtob Biyernes.
Pagabasehan man sang probinsya ang populasyon sang tagsa ka mga lugar.
May pila na ka mga lideres sa Visayas ang nagpalab-ot sang reklamu sa Malacanang bangud sang mahinay nga panagtaganay sang Covid-19 vaccines sa pihak sang pagsaka sang active cases.
Pero ginsiling sang pamunuan sang probinsya nga wala sila sang may mahimu sa kun ano man ang mangin prayoridad kag basehan sang Inter Agency Task Force bisan sa pagpatuman sang mga quarantine measures..sa baylo nga magbatun kag atubangon na lamang ang problema sa kutob sa masarangan sang probinsya.
